Төрсөн өдрийн тоо бидний хувь тавиланд маш том үүрэг гүйцэтгэдэг. Бид бүгд хэрхэн янз бүрийн нөхцөл байдалд өөр өөрөөр биеэ авч явдаг тухай, хүн бүрийн дотор маш олон ойлгомжгүй, сонирхолтой хувь хүн нуугдаж байдаг тухай бодоод үз дээ? Хүний төрсөн он, сар, өдөр нь тухайн хүнийхээ зан ааш болон үйлдэлтэй шууд хамааралтай бөгөөд хувь хүний зан чанар болон хувь тавилангийн эргэлтийг урьдаас тодорхойлдог. Бид хүмүүсийг 12 тусдаа орд дээр тулгуурлан дүгнэж хэвшсэн. Гэхдээ орд бүр дотроо хэд хэд ангилагддаг. Хүмүүсийг төрсөн хугацаагаар нь ангилсан дэлгэрэнгүй зурхайд анхаарлаа хандуулна уу.
Нэгдүгээр сарын 1-10
Энэ хугацаанд төрсөн хүмүүс дотны хүмүүстэй нь холбоотой хэрүүл маргаан, үймээн самуунд дургүй. Тэд тэвчээртэй, ажилласаг хүмүүс. Тэд хэзээ ч бусдад атаархдаггүй. Эдгээр хүмүүс их эрч хүчтэй учир санасандаа заавал хүрдэг бөгөөд бүхнийг өөрөө хийхийг хүсдэг. Тэдэнд тайван байдал мөн аюулгүй байдлын мэдрэмж чухал байдаг. Тэд эелдэг, үнэнч, шударга бөгөөд анхаарал халамж хүсдэг. Мөн хэзээ ч бууж өгдөггүй хүмүүс юм.
Нэгдүгээр сарын 11-19
Тэд маш эмх цэгцтэй, авьяастай, ухаалаг хүмүүс. Ийм хүмүүс боловсролыг дээдэлдэг бөгөөд олж авсан ур чадвараа хэзээ ч алддаггүй. Тэд бүтээлч санаагаа өдөр тутмын амьдралдаа хэрэгжүүлэхээс гадна юу хэрэгтэй, юу хэрэггүй гэдгийг хурдан тодорхойлох чадвартай байдаг. Шаардлагатай үед харилцаандаа хатуу, ширүүн хандаж чаддаг. Нэгэн зэрэг олон зүйл бодох чадвартай. Тэд ажилдаа амжилттай бөгөөд юмыг ажиглах өндөр авьяастай.
Нэгдүгээр сарын 20-29
Энэ хугацаанд төрсөн хүн шударга, өвөрмөц, бүтээлч байдаг. Тэд хүчтэй нөхөрлөлийг дээдэлдэг. Өөрийн мэдрэмжээ удирдаж дэс дараалалтай үйлдэл хийдэг. Тэд байнга юм бодож тунгаадаг бөгөөд энэ нь үргэлж бүтээлч бодлууд байдаг. Эдгээр хүмүүс юмыг хурдан сурч маш хурдан сэтгэх чадвартай. Тэд цаг үеэсээ түрүүлж урагшилдаг бөгөөд хүнд хэцүү бэрхшээлийг хялбархан даван туулдаг. Тэд хязгаарлалтад дургүй.
Нэгдүгээр сарын 30 – Хоёрдугаар сарын 8
Энэ хугацаанд төрсөн хүмүүсийн онцлог: ухамхай, хурдан сэтгэдэг, үнэнч шударга, нинжин сэтгэлтэй, тиймээс тэд хуурмаг хүнд дургүй. Гадаад хэл сурахдаа маш сайн, уран үгтэй бөгөөд ямар ч орчинд байсан хүмүүсийн анхаарлыг амархан татдаг. Хошин шогийн мэдрэмж сайтай. Ухаалаг бөгөөд хүнийг ятгахдаа гарамгай. Бусдын туршлагыг амархан сурч хэрэгжүүлдэг. Богино замаар үр дүнд хүрдэг. Шинжлэх ухааныг дээдэлдэг бөгөөд маргах, мэтгэлцэх дуртай хүмүүс байдаг.
Хоёрдугаар сарын 9-18
Энэ хугацаанд төрсөн хүмүүс шинэ мэдрэмж авах дуртай, эрх чөлөөг дээдэлдэг, бараг бүх зүйл дээр шинийг сэдэгчид байдаг: шинэ газарт дуртай, загварын ертөнцтэй хөл нийлүүлэн алхдаг бөгөөд өөрсдөө өвөрмөц, сонирхолтой зүйлсийг бүтээж чаддаг. Тиймээс тэд нэгэн хэвийн амьдралыг үзэн яддаг. Найз нөхдийн өргөн хүрээтэй гэхдээ хэтэрхий шилэмтгий. Тэд маш сайн ажиглагчид бөгөөд эсрэг хүйстнүүддээ ихээр таалагддаг.
Хоёрдугаар сарын 19-29
Энэ ангилалд багтсан хүмүүс төсөөлөх чадвар сайтай, дотны хүмүүстээ халамжтай бөгөөд маргалдах дургүй. Бусад чанарууд: өрөвч, зөөлөн сэтгэлтэй, энэрэнгүй. Тэд эерэг хандлага болон бүтээлч чадвараараа бусдаас ялгардаг. Тэд бусдыг шүүмжлэхгүй байхыг хичээдэг бөгөөд өөрөө ч өөрчлөгдөхөд бэлэн байдаг. Хүнд нөхцөл байдалд тэнцвэрээ алдалгүй цааш явах чадвартай. Хайр дурлалын тал дээр гүн мэдрэмжтэй, романтик, өгөөмөр.
Гуравдугаар сарын 1-10
Гуравдугаар сарын эхээр төрсөн хүмүүс өндөр мэдрэмжтэй байдаг: тэд бусад хүмүүсийн сэтгэл хөдлөл, мэдрэмжийг хялбархан таадаг, ингэхдээ тэднийг хүндэлдэг. Тэд гэр бүлээ дээдэлж хүндэлдэг. Муу зуршилд амархан автдаг. Заримдаа нийгэм дунд тогтворгүй, хэтэрхий даруухан болчихдог. Хайр дурлалд гүн автаж чадна. Хэн нэгэн тэдэнд шударга бус хандвал удаан хугацаагаар санаагаа зовоож явдаг. Төрөл бүрийн авьяастай бөгөөд зөн совин ихтэй. Тэд эсрэг хүйстнүүдийнхээ сонирхлыг ихээр татдаг.
Гуравдугаар сарын 11-20
Эдгээр хүмүүс бараг бүх төрлийн салбарт амжилт олохуйц баялаг төсөөлөлтэй бөгөөд мөрөөдлөө биелүүлж чаддаг. Алсын хараатай, байгалиас заяасан ер бусын чадвартай бөгөөд үүнийгээ удирдахад ганцаар өнгөрүүлсэн цаг хугацаа тусалдаг. Хүмүүст нөлөөлж чаддаг. Хүчирхэг эерэг энергитэй бөгөөд итгэмтгий зантай.
Гуравдугаар сарын 21-31
Эдгээр хүмүүс бие бялдрын хөгжлийн талаас маш хүчирхэг хүмүүс. Урдаа тавьсан зорилгоо тод хардаг бөгөөд түүндээ заавал хүрдэг. Тэд шаардлага өндөртэй бөгөөд хэзээ ч хүссэн зүйлээсээ татгалздаггүй. Хүний тушаал дагахыг хүсдэггүй бөгөөд зөвхөн өөрийн шийдсэн замаар л явахад бэлэн байдаг. Тэд сэтгэл татам, тачаангуй, мөн ганцаар байх нь ховор.
Дөрөвдүгээр сарын 1-10
Бусдаас өөр, өвөрмөц байдлаараа ялгардаг: тэднээс уран бүтээлийн энерги урсан цутгадаг тийм л өвөрмөц хүмүүс юм. Тэд өөрсдийгөө илэрхийлж чаддаг учир гайхалтай жүжигчид болж чадна. Эргэн тойрондоо нөлөөлж маш сайн удирдагч байж чаддаг. Хүссэндээ хүрэх чадвартай. Хэрхэн амьдарч, амьдралаас сэтгэл ханамж авахыг мэддэг.
Дөрөвдүгээр сарын 11-20
Эдгээр хүмүүст олж хараагүй зүйлсээ судалж, сурах нь их таалагддаг. Тэд нээлттэй хүмүүс бөгөөд олонтой харилцах дуртай. Найрсаг, үнэнч, тусч. Тэд өөртөө итгэлтэй, шударга, магтаалд дуртай. Гадаад хэл сурах авьяастай. Заримдаа хэрэггүй зүйлд мөнгө үрэх гээд байдаг.
Дөрөвдүгээр сарын 21-30
Дөрөвдүгээр сарын сүүлээр төрсөн хүмүүс үзэмжтэй, чанартай, анхаарал татам эд зүйлсэд дуртай байдаг. Өөрөөр хэлбэл маш мэдрэмжтэй, уян зөөлөн, бусдын хайрыг татдаг нэгэн. Түүнд материаллаг болон оюуны үнэт зүйлс чухал байдаг бөгөөд тэд үүнийгээ хамгаалахад ч бэлэн байдаг. Эдгээр хүмүүс гоё сайхан эд зүйлс, сайн найз нөхдөөр өөрийгөө хүрээлүүлснээр сэтгэл ханамж авдаг. Тэд хэрүүл маргаан, асуудалд дургүй. Учир нь тэдний амьдралд “бүх зүйл сайхан байх ёстой”.
Тавдугаар сарын 1-10
Энэ хүн оюуны өндөр чадамжтай бөгөөд хүмүүсийн мэдлэг болон боловсролыг хүндэлдэг нэгэн. Маш сайн зөн билэгтэй. Өөрийн сонирхолдоо төвлөрдөг ч үүнийхээ хажуугаар эргэн тойрон дахь ертөнцөө ажиглах дуртай. Тэд их уран үгтэй. Хүмүүсийг хялбархан татдаг. Багаар ажиллах чадвар сайтай бөгөөд зохион байгуулах чадвар өндөртэй. Түүнд түүний эргэн тойрны хүмүүс амархан татагддаг. Эрх чөлөөнд дуртай.
Тавдугаар сарын 11-20
Энэ хугацаанд төрсөн хүмүүс маш найдвартай, үнэнч шударга хүмүүс байдаг. Тэд маш хүчтэй сэтгэл хөдлөлтэй хүмүүс. Тэд хамтрагчаа хүндэлдэг учир тэдний хайранд итгэж болно. Тэд биеэ даасан бөгөөд реализмыг баримтлагчид. Амжилтад хүрэхийн тулд тууштай, их хөдөлмөрлөдөг. Гоо сайхан тэдний хувьд чухал. Эдгээр хүмүүс их гярхай, ажигламтгай. Тэд олон хүнтэй газар байх дургүй. Шударга бус зүйлд дургүй. Сагсуу биш.
Тавдугаар сарын 21-31
Эдгээр хүмүүс бүх талаараа хөгжсөн бөгөөд мэргэн хүмүүс байдаг. Тэд бүх зүйлийг дэс дараалалтай сэтгэдэг, тууштай. Шинэ хүмүүстэй танилцсанаар сэтгэл ханамж авдаг. Тэд их сониуч, шинэ мэдээ мэдээллээр цангадаг. Хурц ухаантай бөгөөд уран илтгэх ур чадвартай. Өрсөлдөгчөө ганцаараа ялахад хангалттай ухаантай.
Зургадугаар сарын 1-10
Зургадугаар сарын эхээр төрөгсөд нийгмийн харилцаа холбооны ач холбогдлыг ойлгодог, ухаалаг, халамжтай, буулт хийхэд бэлэн хүмүүс байдаг. Тэд шийдвэр гаргахдаа маш сайн эргэцүүлэн боддог. Тэд хором бүрээс таашаал авч чаддаг. Тэд зөөлөн сэтгэлтэй бөгөөд маш мэдрэмжтэй. Шинэчлэл, тав тух, чанарт дуртай. Энгийн зүйлс тэдэнд таалагддаггүй. Тэд нөхөрлөл, хайрыг дээдэлдэг.
Зургадугаар сарын 11-21
Эдгээр хүмүүс орчин үеийн сэтгэлгээтэй, бодитой сэтгэдэг. Хүмүүсийг өөртөө татаж тэдэнтэй хурдан дотносож чаддаг. Тэдэнд удаан хугацааны нөхөрлөл маш чухал байдаг. Эрх чөлөөтэй байх дуртай. Дэс дараатай, санаачлагатай хөдөлдөг. Тэдний анхаарлыг ер бусын, өвөрмөц зүйлс татдаг. Тэдний боддогчлон тэд ихэнх хүмүүст таалагддаг. Олон нийт тэднийг үргэлж дэмждэг. Хүсэл тэмүүлэлтэй, бүтээлч, хувь хүнд байж болох бүхий л сайн зан чанар маш сайн хөгжсөн. Шударга бус зүйлтэй эвлэрэх дургүй.
Зургадугаар сарын 22-30
Зургадугаар сарын сүүлээр төрөгсөд: аюулгүй байдалд дуртай, мэдрэмжтэй, өрөвч сэтгэлтэй. Тэдний дотны болон гэр бүлийн хүмүүс түүний хувьд том байр суурь эзэлдэг, тиймээс ч тэд үргэлж түүний хамгаалалтад байж, халамжаар хүрээлэгддэг. Үргэлж үнэний талд зогсож шударга байдаг, гэхдээ хамаатнууддаа буулт хийдэг. Түүний хувьд оюун санааны үнэт зүйлс чухал. Хүмүүст амархан нөлөөлж чаддаг.
Долдугаар сарын 1-11
Долдугаар сарын эхээр төрсөн хүмүүс юмыг тунгаан бодох дуртай хүмүүс байдаг бөгөөд гайхалтай зөн совинтой. Эерэг хандлага, өөдрөг сэтгэлгээтэй. Түүний дотоод гэрэл өөрийн эргэлзээг арилгаад зогсохгүй бусдынхыг ч мөн арилгадаг. Өнгөцхөн бодолтой хүмүүсийг тэвчдэггүй. Хэн нэгэнд итгэж эхлэхийнхээ өмнө заримдаа шалгаж үзэхийг илүүд үздэг. Оюун ухааны чадвараа хөгжүүлэхдээ анхаардаг. Эв нэгдэл болон аюулгүй байдлыг эрхэмлэдэг.
Долдугаар сарын 12-22
Урлагийн авьяастай, урлаг сонирхдог, өрөвч, сайхан сэтгэлтэй – энэ бол долдугаар сарын дундуур төрсөн хүмүүсийн зарим зан чанар юм. Тэд ургуулан бодох чадвар сайтай идеалистууд бөгөөд үргэлж өөрийгөө хөгжүүлэх гэж хичээдэг. Халуун зүрх сэтгэлтэй бөгөөд огтхон ч хувиа хичээдэггүй, хайр дурлалд бүхнээ зориулдаг хүмүүс.
Долдугаар сарын 23 – Наймдугаар сарын 1
Энэ хугацаанд төрөгсөд өөртөө итгэлтэй, биеэ даасан удирдагчид байдаг. Тэд нэр төртэй, бардам хүмүүс. Анхаарал халамжид дуртай, үргэлж олон нийтэд танигддаг. Тэдэнд зохион байгуулах маш өндөр чадвар байдаг бөгөөд бүх ажлаа дурлаж хийдэг. Тэд бол уран бүтээлчид. Тэдний дотоод сэтгэл хөдлөл үргэлж нүүрэн дээрээ бичээстэй байдаг учир тэд тоглоом хийхдээ маруухан. Тэдэнд хамгийн гол нь хайр татам байх нь чухал. Өөрийн бодлоо хялбархан илэрхийлчихдэг.
Наймдугаар сарын 2-12
Ийм хүмүүстэй ярилцах их таатай байдаг. Тэд хөгжилтэй, маш нээлттэй хүмүүс. Өдөр тутмын асуудлуудыг сатааруулж чадна. Сайхан сэтгэлтэй, гэхдээ мөнгө үрэх дуртай. Тэд чанарыг эрхэмлэдэг. Бусдыг гомдоох нь ховор, энэрэнгүй сэтгэлээрээ бусдаас ялгардаг. Аялах дуртай, ямар нэг шинэ содон зүйл олж илрүүлэх дуртай. Тэд итгэлтэй нөхөр учир нууцаа хуваалцаж болно. Тэд эрх чөлөөтэй байх дуртай бөгөөд тэдэнд юм тушаахад хамгийн дургүй.
Наймдугаар сарын 13-22
Эдгээр хүмүүс – байгалиасаа тулаанч хүмүүс. Өөрийгөө золиосолж чаддаг, эрч хүчтэй, өөрийн зориг ухааны тусламжтай санасандаа хүрч чаддаг. Тэд шударга бус байдалтай эвлэрч чаддаггүй. Үргэлж шинэчлэлт хийж байдаг. Тэд хэзээ юу хийхээ мэддэг авхаалжтай хүмүүс. Бие бялдар сайн хөгжсөн. Хүлээх дургүй. Шинэ төсөл, төлөвлөгөөнд маш дуртай.
Наймдугаар сарын 23 – Есдүгээр сарын 1
Эдгээр хүмүүс овсгоотой, ухаалаг. Дэс дараалалтай сэтгэж бусадтай үг хэлээ амархан ололцдог. Гэхдээ тэд асуудалд дургүй. Тэдний хувьд хайр дурлалын харилцаа маш том ач холбогдолтой. Тэдэнд элит орчин, өндөр чанартай үйлчилгээ таалагддаг. Тэд бүдүүлэг байдлыг тэсвэрлэж чаддаггүй. Тэд маш ажигламтгай учир ганц хараад л хүний сул талыг тодорхойлж чадна. Тэдэнд ямарваа нэгэн үйл явдлын шалтгаан нь сонирхолтой байдаг. Тэд нийтэч, мэдрэмтгий бөгөөд бүх зүйлийг мэдэж ойлгохыг хүсдэг.
Есдүгээр сарын 2-12
Тэд амьдралд нухацтай ханддаг бөгөөд том шийдвэр гаргах гэж хичээдэг. Түүний шаардлага болон хүлээлт дэс дараатай байдаг бөгөөд маш бодитой байдаг. Тэр маш ажилсаг, хичээнгүй, ирээдүйгээ төлөвлөдөг. Сахилга баттай, хариуцлагатай бөгөөд зорилгодоо хүрэхийн тулд их хэмжээний хүчин чармайлт гаргадаг. Мөн мэргэжлийн асуудлуудын тухай сайн мэддэг, бодлоготой. Түүнд итгэх нь чухал, учир нь тэр хэлсэн үгэндээ заавал хүрдэг.
Есдүгээр сарын 13-22
Есдүгээр сарын сүүлээр төрөгсөд – зөвхөн ажлын тухай ярьдаг, хүчтэй зан араншинтай. Хайрлаж чаддаг, хамтрагчаа мэдэрч чаддаг. Ухаалаг, сэтгэл татам, тогтвортой, хайрандаа омогтой. Сайхан сэтгэлтэй бөгөөд тайван байх дуртай. Хүмүүстэй харилцах дуртай гэхдээ хэт дөвийлгөх дургүй. Шударгаар тунгаан бодох чадвартай.
Есдүгээр сарын 23 – Аравдугаар сарын 2
Энэ хүмүүс – гоо сайхан, тансаг байдал, чанарыг дагагчид – тэд гоо үзэсгэлэн, сэтгэл татам байдлаараа бусдаас ялгардаг. Хайр гэж юу болох, хэрхэн хайрлах тухай тэд мэддэг. Нийтэч, шинэ санаанд дуртай. Сэтгэл ханамж авахын тулд мөнгөө харамгүй зарцуулдаг бөгөөд өөртөө татгалзаж чаддаггүй учир үүнээсээ болж зарим хүндрэлүүдтэй тулгардаг. Аялал болон шинэ хүмүүстэй танилцах нь тэдний сонирхлыг татдаг. Тэдний амьдралд мөрөөдлөө биелүүлэх боломж үргэлж гарч байдаг.
Аравдугаар сарын 3-13
Аравдугаар сарын эхээр төрсөн хүмүүс бусдын нүдэнд үргэлж сонирхолтой, сэтгэл татам, ер бусын харагддаг. Тэд дүрэм журмыг үзэн яддаг. Тэдэнд эрх чөлөө агаар шиг л чухал. Нийгмийн харилцаанд ач холбогдол өгдөг бөгөөд үргэлж олны дундаас ялгарч харагддаг. Тэд бусдаас өөр байдагтаа баярладаг. Тэд өөрийн гаргасан шийдвэрээсээ сэтгэл ханамж авдаг. Тэд дэлхий ертөнцөд болж буй өөрчлөлт болон шинэчлэлтийг сонирхон ажигладаг бөгөөд олж авсан мэдээллээ амжилттай ашигладаг.
Аравдугаар сарын 14-23
Аравдугаар сарын дундуур төрсөн хүн оюун санаа болон биеийн хөгжил сайтай байдаг. Тэрээр идэвхтэй, хурдан өсөж дэвждэг. Түүний ярьдаг зүйлс сонирхолтой байдаг. Тэдний ухаан олон асуудал шийдвэрлэх чадвартай. Хайр дурлалд тэд илүү дутуу сэтгэл хөдлөлөөр хандах биш харин логикоор ханддаг. Үргэлж өөрийн мэдрэмжээ илэрхийлдэг. Хамтын ажиллагааг чухалд тооцдог бөгөөд шаардлагатай бол хүмүүстэй амархан эвээ олдог. Орчин үеийн шинэ технологи ашиглахыг илүүд үздэг. Тачаангуй болон сэтгэл татам байдал түүний хувьд чухал зүйлсийн тоонд ордог.
Аравдугаар сарын 24 – Арваннэгдүгээр сарын 1
Энэ хугацаанд төрсөн эмэгтэйчүүд – үнэхээр сэтгэл татам, эрчүүд – бурхнаас заяасан онцгой чадвартай байдаг. Тэд нууцлаг, үл мэдэгдэх зүйлсийг сонирхдог, заримдаа ямар нэг увдистай байж ч болно. Янз бүрийн шинэчлэлт, өөрчлөлт нь тэдний нэг хэсэг гэж болно. Тэд өөрсдийн эрхээ хамгаалж чаддаг. Өөртөө итгэлтэй. Тодорхой зүйлд дуртай, дэг журамтай. Бусдын нууцыг амархан олж илрүүлдэг ч нууцыг хадгалж чаддаг. Эдгээр хүмүүс их хүчтэй зан чанартай.
Арваннэгдүгээр сарын 2-11
Арван нэгдүгээр сарын эхээр төрсөн хүмүүс тачаангуй, романтик, дур хүслээр дүүрэн хүмүүс байдаг. Үргэлж өөрийн үзэл санаандаа бат зогсдог. Зөн совинтой бөгөөд үүнийгээ амьдрал дээрээ ашигладаг. Тэдэнд хайртай хүнтэйгээ хамт өөрсдийгөө хөгжүүлэх нь таалагддаг. Тэд уриалаг, бусад хүмүүсийн асуудлыг шийдвэрлэх аргыг олох чадвартай. Тэд бусдын сэтгэлийг засаж өөрийгөө бусдын оронд тавьж чаддаг. Маш хүчтэй зан чанартай бөгөөд тууштай тэмцэгчид.
Арваннэгдүгээр сарын 12-22
Эдгээр хүмүүс гайхалтай чанаруудыг агуулдаг: үнэнч, шударга. Үнэний төлөө тэмцдэг. Тэдний сэтгэл татам байдал, нийтэч зан чанар хүмүүсийн анхаарлыг үргэлж өөртөө татагддаг. Аз үргэлж тэдний араас дагадаг. Юмыг урьдчилан харах авьяастай. Хүнд хэцүү нөхцөл байдлын дараа амьдралын замаар үргэлжлүүлэн алхахын тулд бүх хүчээ амархан цуглуулж чаддаг. Тэдний зургаа дахь мэдрэхүй хөгжсөн байдаг. Тэд эх оронч, гэр бүлээ хүндэлдэг.
Арваннэгдүгээр сарын 23 – Арванхоёрдугаар сарын 1
Эдгээр хүмүүсийн ёс суртахууны шинж чанар итгэмээргүй өндөр: тэд шударга, өөртөө итгэлтэй, хүчтэй хүсэл тэмүүлэлтэй, бусдын мэдрэмжийг хүндэлдэг, мэдлэг боловсролыг дээдэлдэг. Өөдрөг, нөхцөл байдлыг урьдчилж харж чаддаг. Тэд хайраас хамааралтай биш ч үргэлж дотны хүмүүсээ хамгаалж хайрладаг. Тэдний дэгжин байдал, тал талын мэдлэг нь хүн бүрийн анхаарлыг татдаг. Хүмүүст зөв замыг зааж сайн зөвлөгч болж чадна.
Арванхоёрдугаар сарын 2-11
Арванхоёрдугаар сарын эхээр төрсөн хүмүүс зоригтой, идэвхтэй хүмүүс байдаг. Үнэний төлөө маргалдаж тэмцэх дуртай. Зорилгодоо тэмүүлдэг, хэнээс ч хараат бус, бусдын зөвлөгөөг сонсох нь ховор. Тэд итгэл даах чадвартай, амин хувиа хичээдэггүй, хэлсэндээ хүрдэг. Тэд таалагдсан хүнтэйгээ дотно харилцаа үүсгэж чаддаг ба тууштай мөн тачаангуй байдлаараа бусдыг татдаг. Заримдаа тэвчээргүй, бодлогогүй үйлдэл хийдэг.
Арванхоёрдугаар сарын 12-21
Ийм хүн боловсролтой, амьдралын туршлага ихтэй учир үүнийхээ ачаар бусдад амархан нөлөөлж чаддаг. Түүний мэдлэгийн хүрээ, зөн совин, хүсэл эрмэлзэл нь үнэхээр биширмээр. Өөрийн мэдрэмжээ хянах чадвартайгаас гадна магтаалд дуртай. Харилцаанд өөрийн хүсэлд анхаардаг бөгөөд давамгайлагч байдаг. Алдах дургүй. Урлаг, шинэчлэлтэд нээлттэй. Бардам, биеэ даах чадвартай.
Арван хоёрдугаар сарын 22-31
Арванхоёрдугаар сарын сүүлээр төрсөн хүмүүс хариуцлага хүлээх чадвартай, юу хүсэж байгаагаа сайн мэддэг бөгөөд ухаалаг шийдвэр гаргадаг. Сахилга бат сайтай тул том бэрхшээлийг даван туулж чаддаг. Тэдэнд итгэж болно. Үргэлж өөртөө дүгнэлт хийдэг үүнээсээ болж заримдаа гутранги үзэлтэй болчихдог. Дүрэм журам, нөхцөл байдалд дасан зохицох чадвартай. Тэдний хайр сэтгэлд итгэлцэл, хүндлэл хамгийн чухал бөгөөд тэд хамтрагчдаа санаа тавьж, халамжилж, хүндэлдэг. Тэд манлайлах, зохион байгуулах чадвартай. Маш амжилттай хүмүүс.
