Өвлийн цагт амттай, шаржигнасан өргөст хэмх идэхийн тулд өргөст хэмхээ хэрхэн зөв сонгох, хэрхэн даршлах вэ?
Хэрхэн сонгох болоод өргөст хэмхээ бэлдэх нь:
Даршлах өргөст хэмхийг том биш дунд зэргийн хэмжээтэйг сонгоно – амархан дарагдаж амт ордог. Өргөст хэмх нь муудсан эсвэл дотроо хөндий хоосон байхгүй нь мэдээж.
Гурван литрийн шилэн саванд ойролцоогоор 1,5-2 кг өргөст хэмх орно.
Худалдан авсан ч бай, өөрийн ургуулсан ч бай даршлахаасаа өмнө 2-3 цаг хүйтэн усанд хийж амраасан байна. Ингэснээр алдсан шингэнээ нөхөж авахаас гадна илүү шаржигнуур биетэй болох ажээ.
Өргөст хэмхийг юутай даршилдаг вэ?
Яншуй (гурван литрийн саванд 2-3 ш), сармис (4-6 ш), анхилуун перец (5-10 бөмбөлөг).
Үүнээс гадна дараах ногоог нэмж болно (гурван литрийн саваар тооцоолов):
- Үхрийн нүдний 3-5 навч
- Интоорын 3-5 навч
- 1-2 лаврын навч
- 1 навч хрен/тунхуу
- 2-3 хадаасан цэцэг
- 1-3 ц.х гич
- Хэдэн навч кинза, яншуй, гаа
- 1 хэрчсэн лууван
Эдгээр нэмэлт орцоос хамаарч даршилсан өргөст хэмхийн амт шалтгаална. Та өөрийнхөө хүссэнээр туршиж үзэхийн тулд өөрийн дуртай амтлагч ногоогоо ч нэмэх болно.
Өргөст хэмх даршлах арга.
Арга 1: Хурдан
Сайтар угааж цэвэрлэсэн гурван литрийн савандаа бүх орцуудыг (ногоон гоньд, навчнууд, сармис, перец гэх мэт) хийнэ. Дараа нь өргөст хэмхээ шахаж хийнэ: шилэнд аль болох бага зай үлдэхээр хийгээрэй.
Шүүсийг бэлдэцгээе. 1,5-2 литр усанд 2 х.х давс, 1-2 х.х сахар хийж буцалгана. Шилтэй өргөст хэмх дээр 3 х.х 9%-ийн уксус хийж дээрээс нь шүүсээ нэмээрэй.
Шүүсийг халуун дээр нь бага багаар нь хийвэл шил хагарахгүй.
Шилийг ариутгасан тагаар таглаад буцалж байгаа устай том саванд хийнэ. Ус шилний 3/4-ийг эзэлсэн байхаар хийгээрэй. Энэ байдлаар шилээ 7 минут ариутгана. Энэ хугацаанд өргөст хэмхийн өнгө өөрчлөгдөж, сав ариутгагдаж дуусна.
Тагаа сайтар чангалаад доош харуулан тавьж хөртөл нь байлгана. Өргөст хэмх хөрөнгүүт нь хөргөгчинд хийгээрэй.
Арга 2: Найдвартай
Дээрх аргатай адил шилэн саванд бүх орцуудаа хийнэ. Буцалсан усаар шилэн савны хоолойг дүүргээд таглаж 20-30 минут байлгана.
Бага зэрэг халаавал бүр л сайн. Шилэн сав дэлбэрэхгүй ээ.
Савнаас усыг нь асгаад 2 х.х давс, 1 х.х сахар нэмж дахин буцалгана. Ингэж шүүсээ бэлдэж байгаа юм. Бэлдэж байх хооронд дахин нэг буцалсан ус нэмж болно (дараагийн хэсэгт орохоосоо өмнө усаа асгахаа мартаж болохгүй шүү).
Шилэн савандаа 3 х.х уксус нэмж шүүсээ дүүртэл нь хийж таглана. Шилэн савыг доош харуулан тавьж бүтээлгээр хучиж хонуулна. Одоо даршилсан өргөст хэмхээ санаа зовох зүйлгүй хадгалж болно: энэ аргаар даршилсан өргөст хэмх дэлбэрч, муудна гэж байхгүй.
Өргөст хэмх даршлах өөр арга мэдэх үү? Сэтгэгдэл хэсгээр бидэнтэй хуваалцана уу.
